Initiatives News L'info au service du développement
Related Articles
E tuma Hade-kampaañ, jagge keewɗe puɗɗiima feññinde ko kanndidaaji e ɗii suɓngooji hooreleydaagal daɗɗaaɗi 29 jeegoɓuru tawii ko daawal gadanal. Hay so tawii alaa tawo mo Diiso doosɗeyankeewo laawɗinani ndaartagol mum lefol laamu. Sakkitii hollirde ko ndaartoowo laamu, ko hooreejo leydi jaltuɗo oo, Mohamed Seek Ghaswaani. Ko adii ko omo, saakta kanndidaagal makko, tawii heewɓe ine naamnitoo koye mumen, mbele Ghaswaani jogoraani wonde kanndidaa? Ko ɓaawo nde o arti njillu makko to Nuwaadibu laamorgo fagguduyankeewo Muritani, ko saakti wonde ko o ɗaɓɓoowo lefol laamu manndaa ɗimmiijo.
Gila suɓngooji paandii, luulndo Muritani seeraani e rentinde doole mum, ngam suɓaade kanndidaa gooto. Kono ɗuum newaaki, e biyol maɓɓe kanndidaa gooto wonaa feere. Tuugnaade e ciimtol maɓɓe jaltungol ngol, ɓe peññinii heen kanndidaaji 6. Ine jeyaa e ɓeen:
1- Mohamed Abdelazaiz hooreejo Muritani kiiɗɗo gonɗo e dummbirdu
2- Biram Dah Abeidi, mo lefol sarɗiyankeewol mum ittaa,
3- Ahmed Haaruuna
4- Nuurdiin Muhamedu
5- Utoma Sumaare
6- Sadava Seek El Husseynu
Ko ine ɓura lanndaaji sappo e sosiyetee siwil ciifi ngol ɗoo ciimtol.
Gaagaa ɗum, ine waɗi ndaartooɓe laamu teelɗuɓe, ɓe ngalaa hay lannda ngoota maa ɓe lanndaaji mumen cuɓaaki ɗumen kono kollitii ko kanndidaaji, ko wayi no Dr Hamedin Muttaar Kan e Maître Iid Mbaarek.
Ɓesngu leydi ndii, ine naamnitoo hoore mum, mbele ɓee ɗoo ɗiɗo, kanndidaagal mumen ine jogori laataade: Biraam Dah Abeydi mo lefol sarɗiyankeewol mum ittaa caggal wullitannde tuumeede haalde ko woodaani e Mohamed Abdel Asiis laaminooɗo tuggi 2009 haa 2019, dummbiraaɗo nguyka jawdi laamu e mbuuñaari.
Hikka noon faandaare luulndo ngoo e wiyde mum, ko nawde kanndidaa lannda laamu nguu e daawal ɗimmal. Siftinde yamiroore laamu ƴettaande kampañ suɓngooji ɗii, fuɗɗotoo ko aljumaa14/6/2024 saanga pecce jamma joofa alkamiis 27/6/2024 pecce jamma.
JP
