Related Articles
Jaagorɗe leydi Moritani e nanndidiiɓe mumen Senegal njeewtidii ko yowitii e tiiɗtinde jokkondiral leyɗe ɗiɗi ɗee. Jaagorgal Moritani toppitiingal geɗe ndernderiije yeewtidii e nanndo mum Senegaal Jean Baptiste ko faati weeɓtinande ɓesngu Moritani e Senegaal, ngam leyɗe ɗiɗi ɗee njahondira ko aldaa e visa…Ɓe teeŋtinii maa ɓe ndaro heen, ɗum waasa saɗtineede ngati wisa fotaani wonde hakkunde ɗee leyɗe ɗiɗi jiiduɗe. Nder yeewtere maɓɓe teeŋtinaama heen, haɓaade kala ɗanngal ngal ɗooftaaki sariya, ko siynaa hakkunde ɗee leyɗeele ɗiɗi e Dental Orop, yo rewe.
Gaa gaa ɗum nih, Jaagorgal leydi Moritani ko feewti e caasam e petroŋ Mohamed Ould Khaled e nanndo mum Senegaalnaajo biyeteeɗo Birama Souleye Diop ciifi nanondiral, eɓɓaande gaas e wiyde maɓɓe nduu ɓunndu gaas, ko fartaŋŋe mawɗo mo leyɗe ɗee ndañi ngam mbaawa golloraade ɗum cosa heen golle ngam ɓamtira nokkuuji mumen e oon kaalis jogorɗo heɓeede heen oo. Caggal ciifondiral beetawe hanki oo, kihiiɗe oo batu golle e tawtoregol jaayndiyankooɓe yuɓɓinaama e dow gardagol hooreeɓe jaagorɗe ɗiɗo ɓee to nokku jaagorgal garwaniiwal ngal.
Kuccondiral maɓɓe e jaayndiyankooɓe hanki kihiiɗe, ina jeyaa e ko ɓuri teeŋtude ko tiiɗtingol jokkondiral hakkunde leyɗeele ɗiɗi ɗee sabu eɓɓaaɗe hooreejo leydi Moritani e Senegaal. Geɗe keewɗe baɗanooɗe ko ɓooyaani (Kawtal faggudu Dakar). E wiyde gardiiɗo jaagorɗe Senegaal US, wonde pont Rosso won golle keewɗe ndookii ɗum. Ndeen noon ɗeen golle poti joofoyde ko e nder 2026- So tawii noon ko nanndo makko Moritaninaajo oo Mr. El Moctar Ould Djay oon ruttiima e jokkondire daartiyankeeje ɗee leyɗe ɗiɗi ɗee ndenndi, o teeŋtinii Moritani ine udditanii Senegaal dame dañirɗe mum kala. Gila to bannge awo, diƴƴe ekn.
Siftinde njillu gardiiɗo jaagorɗe Senegaal hono Usmaan Sonko, maa duumo fodde balɗe tati, ko hannde talaata joofata.
JP
