Initiatives News L'info au service du développement
Related Articles
Hooreejo jaagorɗe Espaañ Pedro Sanchez arii hanki talataare to Nuwaasot. Jaɓɓii mo to boowal laaɗe diwooje ko hooreejo Moritani Mohamed Seek Ghaswaani. Faandaare njillu nguu, ko darodaade e Moritani ɓeyda tiiɗnaare mbele haɗde ɗanle ɗe ndewaani laawol. Hooreejo jaagorɗe Espaañ, Pedro Sanchez hollitii wonde Espaañ ine wonani ɗanngal, koolningal, jamiraangal kadi dewngal laawol. O yeewtidii e Hooreejo Moritani kadi nanondiral jowitiingal e haɓaade ɗanle hakkunde Nuwaasot e Madrid ɗe ɗooftaaki sariya siifaama hanki.
Caggal lebbi 6 ko Pedro Sanchez yillinoo Moritani, nguu ɗoo njillu waɗti laawol ɗimmol. Faandaare arwaniire e ɗee teppe-duufe hakkunde Madrid e Nkchtt, ko ciifondiral ngam haɓaade ɗanle ɗe ndewaani laawol. Ɗuum ko caggal nde teskaa uujo Moritaninaaɓe yaaɓanooɓe doŋre Orop, tawii ko ɗanle ɗe ɗooftaaki sariya. Ɗuum nih saabiima laamu Espaañ saaktude wonde Moritaninaaɓe Orop limre mumen hakkunde janvier et ut sowiima laabi ɗiɗi so yerondiraama e hit yawtunde. E biyol maɓɓe.
Gardiiɗo jaagorɗe Espaañ, Pedro Sanchez hollitii wonde Espaañ riiwtaani ɗanngal, dewnengal laawol, ɗooftingal sariya…Ɗuum ko ɓaawo nde o naati hanki talaata Nkchtt, o holliti ɗum tuma jiyondiral makko e Med Cheick Ghaswaani. Ko e sahaa nguu njillu Espaañ fuɗɗii waawnude yimɓe jogaade visa de transit, ɓeen Moritaninaaɓe darotooɓe nder boowe laaɗe diwooje Espaañ, ngal pellital fuɗɗotoo siyneede ko hannde 28 ut.
Jaagorgal Espaañ Pedro Sanchez e hooreejo Moritani Med Cheick Ghaswaani nanondirii yuɓɓinde lulnde sahaa fof ɗo 2025. Hooreejo jaagorɗe Espaañ teeŋtinii, tiiɗtinde jokkondiral, hakkunde leyɗe ɗiɗi ɗee ngam dikkaade e haɓaade ɗanle ɗe ndewaani laawol. Ɗuum ko e sahaa jeewtidal maɓɓe e jaayndiyankooɓe jamma hanki. Sànchez teeŋtinii nafoore ɓeydude tiiɗtinde gollodaade e fannu ɗanngal, cellal e kisal e yaajtinde ceŋɗe goɗɗe ngartam ndenndeɗam. Ngal ɗoon ciifondiral ndenndengal hollitta ko gollodaade e ɗanngal woni arwannde nder jotondire leyɗe ɗiɗi ɗee.
Sanchez hollitii wonde ɗanngal fotaani faamireede ko caɗeele, kono ko ɗum ngoƴaaji…Ndeen noon peeje ine poti dañeede ngam gaddaade haa ɗanngal ngal rewa laawol jamiraangal. Sanchez artii e wiyde nder yeewtere jaayɗe, Moritani ko leydi keewndi ɗannotooɓe, etee omo faami ɗanniyankooɓe ine njogii darnde mawnde ɓamtude faggudu Espaañ. E wiyde makko, ɗanngal ine jibinani Espaañ ngalu e ɓamtaare, kono ɗanle ɗee no yahratee foti ko ƴeewteede.
Nanondiral jowitiingal e ɗanngal hakkunde Madrid e Nkchtt siifaa ko jamma hanki, tawii ko Jaagorgal ndernderiije Moritani Mohamed Ahmed Ould Mohamed El Amin, e Jaagorgal Kisal renndo e ɗanle Kaanaŋkiri Espaañ, ciifi ɗum e yeeso hooreejo Moritani Med Ch e hooreejo jaagorɗe Pedro Chanchez.
JP
