Related Articles
Oorngal ngam suɓngooji sarɗiyankooɓe, diiweyankooje e meeriije, udditii e pecce jamma hanki e ndee aljumaare.
Ko ñande 13 lewru joyɓuru ɓesngu Muritani wonɓe nder wertaango leydi haa caggal leydi, noddaa nde cuɓotoo meeruuji, diisneteeɓe diiwe haa nih e sarɗiyankooɓe, ngam suɓaade176 sarɗiyanke, tawii ɗereeji gooteteeɗi ɗii ko 4. Ɗerewol ngam doggol nokkuureyankeewol, ɗerewol gonngol ngam doggi ngenndiije, tataɓol ngol jagganaa ɗum ko rewɓe ndaartooɓe ɓee. Ngal oorngal suɓngoyankeewal noon, dañii mbaylaandi kesiri e ndee hitaande, ngati won ɗerewol gootirteengol ngol sagataaɓe ndaartooɓe jogiiɓe ko famɗi kala duuɓi 35 ndokkaa. 11 joɗnde suɓateende wonande ɓeen sagataaɓe to suudu sarɗiiji.
Doggi kesi kono kadi waywaylo seeɗa wonande lannda laamu, e biyol Goomu Ngenndiiwu Suɓngoyankeewu Jeytiingu Ceni lannda laamu, El Insaf addii doggi sarɗiyankooɓe palɗe lesdi ndii kala. To bannge luulndo, lannda islaamyankeewa Tawasul, semmbe gadano luulndo, tuma suɓngooji baɗtindiiɗi ɗii, e lannda Sawab ka luulndiyanke Biram Dah Abeydi tawti ine tawee hedde nayaɓe tati nder palɗe lesdi ndii. Jiidaa e lanndaaji goɗɗi dentuɗe, mbaɗi kaɓɓondire, ko wayi no kaɓɓondiral nguurdiigu, e kaɓɓondiral nguurdiigu/Goonga e Beldital kam e Yaakaare Muritani kaɓɓondire, jeyaaɗe e ɓurɗe jogaade doole e ɗii suɓngooji.
Oumar Elhadj THIAM
