Related Articles
Fedde fuku koyɗe leydi Moritani hollitii aljumaa hannde gittugol Amiir Abdul gardinooɗo kippu Muurabiɗuun. Ɓooregol makko e golle waɗi, balɗe seeɗa caggal nde kippu nguu horii yahde Kubeeri Afrik Ngenndiiji 2025 to leydi Marok.
Ɗum saaktaa ko e joofnirde batu Diiso Fedde Moritani toppitiinde Fuku koyɗe, tawii ko batu keñoraangu e dow gardagol Ahmed Wul Yahyaa, hooreejo Fedde ndee.
Diiso ngoo yettii Amiir Abdu, sabu golle lobbe ɗe o waɗani kippu ngenndiijo gila o fuɗɗii gollodaade e maɓɓe. Diisnondiral ngal toɗɗiima gardiiɗo kippu ngenndiijo biyeteeɗo Aritz Lopez Garay, lomtiioɗo Amiir Abdu.
Diisnondiral ngal fellitii kadi nawde pottitte hono poolotire ɗee denndaangal kippuuji ngenndiiji to Stade Nuwaadibu, ngam fuɗɗaade golle eɓɓaande peewnitgol Stade Seek Boydiya.
Diiso ngoo halfinii Goomu kippuuji ngenndi ndii nde gollodata e njuɓɓudi karallaagal Fedde nde, ngam ƴettude peeje karallaagal kuuɓtodinɗe, tawa ndaɗɗudi mum ko ƴellitde porogaraam laaɓtuɗo ngam artirde denndaangal kippuuji ngenndi ndii e kiwondire doŋe ɗee ko ɓuri yaawde. Mbele waawde wallude kippu ngenndiijo oo ngam tawtoroyeede Kubeeri Afrik Ngenndiiji, e tawtoreede kawgel ngel no feewi e semmbe E nder denndaangal kiwondire diiwe ɗee e doŋe ɗee e to hakkunde leyɗe.
JP
