Related Articles
Jaagorgal leydi Espaañ kalfinaangal ndeenka hono no Margaritas Robles waɗi njillu balɗe ɗiɗi ɗo e Nuwaasot. Nguu ɗoo njillu jeyaa ko e kisal keeri leydi, ngam haɓaade ɗanle ɗe ndewaani laawol. Jaagorgal leydi Moritani hono Hananah Ould Sidi e nanndo mum Espaañ ndañii yeewtidde ko faati e kisal e jotondiral hakkunde konuuji leyɗeele ɗiɗi ɗee.
Ko haala ɗanniyankaagal e ngonka kisal e nder diiwal Saahel woni toɓɓe teeŋtuɗe ɗe jaagorɗe ɗiɗi ɗee kaaldi. Jaagorgal leydi Espaañ teeŋtinii wonde e ɗii duuɓi cakkitiiɗi Moritani wontii damal jawtirgal doŋre Orop. Ɗanngal ngal ɗooftaaki sariya, woni toɓɓere yeewtere maɓɓe yummaare to jaagordu ndeenaagu geɗe yahɓe fooftere duumiinde e sukaaɓe sahodinɓe.
Jaagorgal leydi Espaañ teeŋtinii wonde leydi mum ina hebli wallude leydi Moritani ngam hisnude keeri leydi ndi e dañde peeje ngam haɓaade kala ko ina naata e nder leydi ndii ko rewaani laawol.E wiyde Hananh Ould Sidi, jaagorgal ko feewti e ndeenka leydi Muritani, wonde ngonka diiwal Sahel, haa teeŋti noon e leydi Moritani, ina heddii e wonde ngoƴa mawɗo, mbaawka saabaade caɗeele faggudu. Doggol yimɓe heewɓe, ɗanniiɓe ɓe ndewaani laawol ɓeydiima e ndee hitaande, no o wiyri. Jaagorgal leydi Espaañ yiyondirii kadi e hooreejo leydi ndi hono Mohamed Cheïck Ghazwani, ɓe kaaldi ko feewti e ɓeydagol golle ngam hisnude e reende keeri ɗii.
Siftinde ko ina ɓura 80 ɗanniyanke ɓe ndewaani laawol nanngaama ñande talaata ndee to Nuwaadibou, tawi ko reenooɓe maaje Moritani njaggi ɓe. Heen ɗiɗo maayii.
JP
