Related Articles
Jaagorgal Pinal, Ñeeñal, jokkondiral e Jotondiral to parlamaa, hono El Husseynu Wul Meddu, ardiima, altine hanki to ñiiɓirde Jaaynirde Moritani (AMI), nder Nuwaasot, udditgol laawɗungol lowre saaktirde renndo AMI e nder ɗemɗe ngenndiije.
Ndee ɗoo lowre hesere faandaare mum ko wallitde renndooji ɗi kaalataa ɗemngal Arab mbele keɓa kabaruuji laawɗuɗi e ɗemɗe mum en neeniije, tawa ina wondi e sarɗiiji doosɗe leydi ndii e teddinde doosɗe potal e hakke kala ɓiɗɗo leydi heɓde kabaruuji.
Ndee ɗoo lowre ko nde adannde e sifaa baaɗo nih nder ngenndi ndii, maa jogo batte keewɗe e tiiɗtingol keewal e nder loowdi e peewnugol e gaddagol ɗeenɓjaaynirɗe ɓadtoo ɗemɗe ngenndiije ɗee, tawo ina yahdi e dawrugol renndo jowitiingol e tiiɗtinde ñootondiral renndo e tiiɗtinde ɓure ɓiileydaagu e nder denndaangal goytaali mum.
Jaagorgal Pinal, Ñeeñal, jokkondiral e jotondire to parlamaa, e nder konngol mum udditgol ndeeɗoo lowre hesere, hollitii wonde ngal jaɓɓal ari ko ɓadtaade sarwiis jaayndeeji wondude e ɓiɗɗo leydi ngam heɓde humpitooji e fawaade e yiyannde Hooreejo leydi ndii Mohamed Wuld Seek El-Gaswaani, golloowo ngam tiiɗtinde ngootaagu ngenndi e heɓtinde keɓtinirgal mum ngenndiwal renndinde leƴƴi ceertuɗi wonande renndo Moritani, teeŋtinde wonde udditaare ɗemɗe ngenndiije ceertuɗe ina foti wonde huunde himmunde wonande renndo ngoo e rokkude ɓe kala ko ina waawi tiiɗtinde jokkondiral jeeɓoowo e jaayɗe ngenndiije.
O teeŋtinii wonde mbayliigu jaŋde mbaɗaama ngam jaabtaade sarɗiiji baɗɗi ɗemngal Arab ngal wonde ɗum ɗemngal laawɗungal e ɗemɗe ngenndiije keddiiɗe ɗee, ɗemɗe potɗe janngeede e nder duɗe ɗee, yanti heen bayyinaango tijjaango wonde yamiroore yowitiinde e keewal pine e rajooji renndo ɗii, teskaama so famɗii ko ina wona hitaande, Mahadra e ɗemngal Soninke mbinnditaama e nder UNESCO, batte wonde ɗum ndonaandi e ɗemngal winndereyankeewal e ko woni nafoore ndonu ngenndi.
Jaagorɗo oo hollitii kadi jojjugol udditanaade caaktirɗe renndo ɗii tawa ina rokka heen humpitooji e tabitinde humpitooji e ɓadtaade huutortooɓe sarwiis caaktirɗe ceertuɗi.
To bannge makko, gardiiɗo Kuuɓtodinɗo kumpital Moritani, AMI hono Moktaar Malal Jah hollitii wonde ngal ɗoo jaɓɓal ngenndiwal jeyaa ko e yiɗde hooreejo leydi ndii hono Mohamed Wuld Seek El-Ghaswaani ngam tiiɗtinde ngootaagu ngenndi e mahde ngenndi paarnoriindi keewal mum, ɗum woni sewnde ngalu e goodtiɗingol wonande leƴƴi mum, kadi e mosol cemmbingol ngootaagu mum, teeŋtinde wonde ndeeɗoo lowre ina jeyaa e golle baɗaaɗe ngam ɓamtude sarwiis jaayndeyaagal e ɓiɗɗo leydi, e huutoraade ɗum no haanirta nih e jamirooje jaagordu Pinal e nder njillu mum to « Agence » ñande 9 juko (ut), fawaade e rokkude ɗemɗe ngenndiije nokku e nder jaaynirde ‘Agence’.
O ɓeydi heen wonde ngal daawal maa rewinde e ƴellitgol sarwiis jaaynirde « Agence » oo, ñiiɓɗo e golle mum, e pellital mum yaajnude kabaruuji naftortooɓe sarwisaaji mum, e ƴellitde humpito eɓɓooje rewrude e lulɗe, kawte caaktirɗe pannoriiɗe gollotooɗi kadi ballitooji no moƴƴi e mahngo ngenndi ngootiri ndi enen fof koyɗaten.
Udditgol lowre ndee waɗi ko e tawtoregol heewɓe e ardiiɓe AMI e jaayndiyankooɓe mum.
Fulo: Oumar ElHadj Thiam
