Related Articles
Ngol woni njillu makko ngadanngu e leydi Moritani gila nde lannda maɓɓe dawrugol heɓi laamu. Faandaare njillu gardiiɗo ɗowngu laamu Senegaal Usmaan Sonkoo ko tiiɗtinde gollodagol maɓɓe to bannge faggudu e nder fannuuji keewɗi, hakkunde leyɗeele ɗiɗi ɗee ko wayi no, tiiɗtinde gollodaade e nder ceŋɗe caasam, awo, yah-ngartaa, kisal, e ngonka koɗorɗe arani en nder ɗee leyɗe ɗiɗi. Yanti heen, geɗe ɗiɗi jowitiiɗe e eɓɓaande gaas nde leyɗe ɗiɗi ɗee kala ndenndi GTA wonude e pont Rooso daɗɗiiɗo hakkunde leyɗe ɗiɗi ɗee (Moritani e Senegaal) maa yeewte hakkunde jaagorɗe ɗiɗi ɗee. Ardiiɓe jaagorɗe ɗiɗo ɓee kadi maa njuɓɓin batu altine hannde 13 lewru nduu to Palais des Conférences ngam yeewtidde e ko fayti e ɗanle ɗe ndewaani laawol e nanondiral Sarɗiiji hoɗorde.
Ko ɗum waɗi, janngo 14 lewru nduu, to Palais des Congrès, tuggi 9w00h haa 11w00h, batu maa yuɓɓine toon e gardagol hooreeɓe jaagorɗe ɗiɗi ɗee ngam yeewtidde ko faati e kuutoragol fartaŋŋeeji faggudu kesi (ɓunndu gaas) e dikkanɗe e kuccam yeñcino leyɗeele ɗiɗi ɗee. Gardiiɗo jaagorɗe leydi Senegaal maa yiyondir e hooreejo leydi Moritani, gardiiɗo Dental Afrik Mohamed Cheïck El-Ghazouani. Siftinde noon, wonde nguu ɗoo njillu laawɗungu ngu gardiiɗo ɗowngu laamu Senegaal waɗi ɗo e Nuwaasot ari ko caggal udditgol ɓunndu adanndu eɓɓaande renndaande nde leyɗe ɗiɗi ɗee kuutortoo, woni Moritani e Senegaal.
Umar Elhaj Caam (JP)
