Initiatives News L'info au service du développement
Related Articles
Ko mbeefeegu yimɓe ceppi subaka hanki alarbaare, ɗoo e laamorgo Muritani njaaɓani ammbasad Amerik, hollirde mette mumen e ɗii warngooji pawaaɗi e dow Hamaas. Ɗuum ko caggal nde Palestiin tuumi, waɗi ndeen fettoore ko Konu Israa’iil to Gasaa safrirde Al ahli, saaktaa 500 neɗɗo, waasi heen fittaandu mum. Ko ɓaawo ɗum, hooreejo Muritani bayyini hello mum x : » Ine tini muusalla nder ɓernde mum, ine sunii e ɗii warngooji ».
Seppooɓe ɓee kollitii mette mumen e ngenndiiji Dentuɗi Amerik, e biyol maɓɓe Amerik jaggani junngo ko Israa’iil. Ɗuum saabii ɓe nduppi araaraay Amerik e Israa’iil fof. Laamu Muritani yamirii sunaare ngenndiire fotde balɗe 3, e ngoo wabaawo. Ko noon ne kadi ngu ƴettii pellital oo sahaa, ɓeydude ndeenaagu falnde Tevragh Zeyna, diiwal Nkchtt bannge hirnaange, saraaji ammbasad Amerik, ngati hulde ɗii seppooji baɗooji joo e joo kala e yeeso ambasad oo, gila yaneede helee.
Jannginooɓe jaaɓi haaɗtirde duɗal dowrowal jaŋde e wiɗtooji islaamyankooji wondude e sanɗaaji mumen ceppii alarbaare hannde ngam jaggande junngo Palestiin.
Dr Abdullaay Abdel Maalek kaalɗo e dow innde seppooɓe ɓee, hollitii wonde ɗii warngooji baɗɗi to Gasaa alaa gonɗo caggal mum so wonaa leyɗe doolnuɗe ɗee.
O haaɗaani ɗoon tan, e biyol makko ɗee leyɗe Tuubakooɓe bakkortooɓe hakkeeji aadee, hillanaade hakkeeji rewɓe, yiylotooɓe fawde kuule mumen ko wayi no caaysayaagal e dow leyɗe janane…. Hannde oo nootitaaki e jaɓɓal mumen ngati nana ndaara rewɓe ine mbaree, warngooji kaantorinɗi, cukalon ndewon ndaɗaani kono kaalaani heen haydara.
O daaƴiri ɗii konngi kaaldaaɗi cekedele, wonde winndere ndee kala hannde oo, yiyrii gite mum, ko seede e ɗee nate kaantorinɗe, wabaango yettiingo kaaɗtundi bonannde, ine muɓɓi kunuɗe etee hay leyɗe aarabeeɓe nana ndeƴƴi, pilñitaaki.
Haa hannde ɓee seppooɓe ine njokki waɗde eeraango jokkude seppooji yeeso ammbasad Amerik nder laylayti renndo. Tawii ardii ɗum ko seernaaɓe.
Jaayre Pinal-JP
