Caggal nde o yettii subaka hannde ɗo e Nkchtt, Jaagorgal Senegal toppitiingal geɗe caggal leydi hono Yacine Fall adii fof ko jooɗdaade e Hooreejo Moritani Mohamed Sheek Ghaswaani. E nder ndeen joɗnde o tottii hooreejo leydi Moritani ɓataake ummoraade e hooreejo Senegaal Basiiru Jomaay Fay.
So goonga miin e hooreejo Moritani min mbaawii yeewtidde e ngonka ballondiral e cehilaagal hakkunde leydi Senegaal e Moritani jojjugol semmbinde kaa ɗoo ngonka to bannge aadee kam e to bannge faggudu e renndo. Ɗuum ko konnguɗi gadani ɗi Yaasin Faal jaagorgal Senegaal suuti ɓaawo jiyondiral makko e hooreejo Moritani.
Kono kadi faandaare yummaare nguuɗoo njillu ɗimmu ngu jaagorgal Senegaal kalfinaangal Geɗe Caggal Leydi yuɓɓini, ko arde yeewtidde e nanndo makko ngonka arani en wonɓe nder Moritani ko aldaa e sariya. Kanko Gardiiɗo dipolomasi Senegaal maa o yiyindir nih e jagge laamu nguu keewɗe, ɗuum jiidaa e batu ngu jogori waɗdude wonanɓe Senegaal ɗo e Moritani e alhaali ngonka Senegaalnaaɓe wuurɓe ɗo e Moritani.
Nduu ɗoo njillu ari ko caggal nde laamuleydi Moritani ƴetti pellital nawtude arani heewɓe, to leyɗeele mumen, tawii ɓurɓe heewde ɓee njeyaa ko to Mali, Senegaal, Gine, Kodduwaar.
JP
