Related Articles
Gonnooɗo hooreejo leydi ndii, hono Mohamed Ould Abdel Aziz, tuumi lanndaaji ɗii wonde ina kaɓa e makko, o teeŋtini wonde kasoo makko duuɓi tati ko tooñannge, ko fenaande, tee sabaabu mum ko daɗɗi ko to batte diiwaan, politik e kinɗe ko jiidaa e golloraade nafooje keeriiɗe. o haali ɗum ko e ñaawoore makko hannde altine, o ɓeydi heen wonde ko Khalil Ould Tiyeb ardii goomu nguu, toɗɗaaɗo hooreejo fedde nde, tawi ko baaɗiiko toɗɗaaɗo e SNDE, mo o « wujji » » o wiyi.
Ould Abdel Aziz ina jokki e fawde tuumaluyaaji, ina wiya wonde jom jawdi ganndaaɗo ine dogdogannoo e laamu nguu haa o dañi feere naatde e Senaa ngam buuñde terɗe laamu leydi ndii, o addana ɗum jaɓde waylude doosɗe leydi.
O haali kadi ko feewti e Moustafa Ould Liimam Chafei, o wiyi omo jogii dossier mo o foti ñaaweede. Oon ina wiyee o tawtoraama operation seɓɓitiiɓe to wuro Néma e wondude e Ould Hammam. Gonnooɗo gardiiɗo DGSN hono Seneraal Mohamed Ould El Hadi ina anndi detal ndeeɗoo ñaawoore. Ko sabu naatgol hooreejo leydi ngoɗndi, e oon dossier waɗi hooreejo leydi hannde oo, hono Mohamed Uld Cheikh El-Ghazouani, jooɗii e kaan haala.
Ould Abdel Aziz kadi yanii e hooreejo goomu parlemaa, hono Habib Ould Djah, mo o siftini wonde « ɓadiiɗo hooreejo leydi hannde oo », o ɓeydi heen wonde goomu nguu, ngu fotnoo wonde ko yeru, ko neɗɗo, ganndiraaɗo fenaande, buuñaaɗo ardii ɗum » . o wiyi.
Ko o jom jawdi to Nuwaadhibu, hay so tawii o yiɗiino wonde hooreejo Ñaawirde Toownde Haute Cour de Justice caggal ñaawoore ndee, ɗum dañaani, sabu luural e golle makko.
Kono o naftoriima won e martabaaji, ina jeyaa heen teereŋaaji to Nouadhibou, gollinde ɓiyiiko gorko to galle laamorgo e ɓiyiiko debbo to agence Tadamoun, wonti Taazour. Ɗum jiidaa fotde 100 miliyoŋ ouguiyas mo jom en njulaagu njoɓata mo.
Gonnooɗo hooreejo leydi ndi wiyi ina jogii caɗeele keeriiɗe e gonnooɗo gardiiɗo jaagorɗe leydi ndii hono Yahya Ould Ahmed El Waghf, mo o tuumi gila ko ɓooyi wonde ko kañum addani SOMAGAZ yande, kadi ko kañum soodi maaro cuytuko.
O yani kadi e Lemrabott Ould Bennahi, toɗɗenooɗo jaagorgal, e Dane Ould Ethmane, gonnooɗo Koolaaɗo kuuɓal jaagorɗe, mo o tuumi kadi diirtinde miliyoŋaaji.
Gonnooɗo hooreejo leydi ndii oo haalii e bannge siwil oo, o wiyi wonde gooto e terɗe ɗee woppii naamnaade mo yo o wallu heɓde jappeere hooreejo fedde awokaaji, e ballal politik . Gooto e terɗe siwil en riiwaa e fannu jaŋde e sahaa Maaouiya. Goɗɗo wujjii oto tout terrain.
Ould Abdel Aziz joofniri konngol mum ko e yettude Biram Dah Abeid e gonnooɗo jaagorgal ñaawoore Haimoud Ould Ramdane sabu mum en salaade kala tawtoreede ndeeɗoo ñaawoore (nde duuɓi sappo).
« Ko mi toɓɓaaɗo. Mi gollaniima leydi ndii duuɓi 31 hono ofisee dowrowo, mi fiilaama darnde Seneraal, duuɓi 13 wonde mi gardiiɗo leydi. Daartol am fotaani wayde nih. » No o wiyri.
JP
