Jahgol Alseri ɗo leydi Moritani e leydi Alseri ina tiiɗtina jokkondire mumen to bannge ndeenaagu. Ndee alarbaare, 17 lewru 4ɓuru, leyɗe ɗiɗi ɗee ciifi nanondiral gollondiral to bannge Ndeenka. Ko siifannde waɗaande e sahaa njillu laawɗungu fodde balɗe nay ngu Jaagorgal Ndeenka Moritani hono Hananna Wul Siidi gardiiɗo sete konuŋkooɓe yuɓɓini to Alseri. Nder ginol golle maɓɓe, toɓɓe keewɗe njeewtaama hakkunde makko e nanndo makko, ko wayi no: Cooynanɗe kisal denndaaɗe, reende keeri ɗii e haɓude e wujjulaŋkaagu hakkunde-keeri.
Ngolɗoo gollodagol konuŋyankeewol waɗi ko e nder njillu jaagorgal ndeenka leydi Moritani, hono Hanana Wuld Siidi, tawi omo wondi e sete makko konu to Alseri. Jaagorgal ngal jooɗdiima e gardiiɗo konu leydi Aljeri hono General Said Chengriha. Toɓɓe keewɗe njeewtaama heen, ina jeyaa heen ballondiral e ndeenka hakkunde leyɗeele ɗiɗi ɗee.
Ndal ɗoo nanondiral ina yiɗi semmbinde jokkondiral hakkunde leyɗeele ɗiɗi ɗee e golle laaɓtuɗe ko wayi no reende keeri, gostondire humpitooji e haɓaade wujjulaŋkaagu hakkunde keeri ɗii.
Njillu nguu ina jogii kadi mbaadi pehe, tawi faandaare mum ko tiiɗtinde gollondiral kisal e nder kulhuli gooti denndaaɗi, ko wayi no bonanndeeji keeri. Nanondiral jogingal mbaadi strateeji, e nder ngonka diiwal fitinaaji.
Jokkondire konuŋkooje hakkunde Alseri e Moritani ina tiiɗi gila ko ɓooyi. Hitaande ɓennunde ndee, leyɗe ɗiɗi ɗee mbaɗii kadi eɓɓaande renndaande e mahngo laawol tacci-keeriwol e sosde posto-keerol.
Seneraal Said Chengriha teeŋtinii wonde diiwal Afrik-worgo ina jogii caɗeele keewɗe to bannge kisal, faggudu e geɗe politik, ko ɗum waɗi ngool gollondiral ina foti wonde huunde himmunde.
Ngam siftinde, Moritani ɓeydii gollondire mum konuŋkooje e ɗii duuɓi cakkitiiɗi. Maayirɗe yontere ɓennunde ndee tan, e nder njillu hooreejo leydi Ceki to Nuwaksot, nanondiral gollondiral konu siifaama e nder gostondire ngam ƴellitde deeƴre diiwal ngal e nder ɗee caɗeele dookiiɗe ɓeydotooɗe.
JP
