Related Articles
Caggal yontere ko polis fiyi hello jannginoowo gooto e nder seppo, yuɓɓinenoongo to Place de la liberté, hono boowal wellitaare. Jaagorgal ndernderiije jaajtingol laamu e ɓamtaare nokkuuji ɗii hollitii wonde hooreejo leydi ndii hono Mohamed Seek Ghazwaani yamirii udditgol losko ko yaawi ko feewti e alhaali polis gooto piyɗo jannginoowo hello e hakkille.
Jaagordu nduu hollitii e bayyinaango yaltungo hanki kikiiɗe aljumaa, wonde hooreejo leydi ndii, hono Mohamed Seek Ghazwaani, yamiriino hoohooɓe laamu nguu yo ƴettu peeje jojjuɗi no fotiri fof ngam hollirde geɗe baɗɗe ɗee, e ƴettude kuule, tawa ina yahdi e sariyaaji.
Bayyinaango jaagordu nderndeeiije ɓeydii heen wonde Ghazwaani teeŋtinii jojjugol ƴettude peeje jaawɗe juumtuɗe, baawɗe wonde fof ngam hisnude jiilirɗe jaŋde e kisal, e ƴellitde e ɗoftaade hakkeeji aadee, ɓiɓɓe leydi e nder kala ngonka.
Jaagordu ndernderiije ɗee, hollitii goomu losko cosaangu nguu waɗi ko ɓee ɗoo yimɓe:
– Cukko-Gardiiɗo kuuɓtidinɗo Kisal ngenndiwal
- Koroowo Kuuɓtidinɗo Jaagordu ndernderiije
- Koroowo Kuuɓtidinɗo Jaagordu Jaŋde Ngenndiire
- Nootaniiɓe senndikaaji ɓe ɗum toɗɗii ɓee
O hollitii wonde goomu nguu maa gollo ngam loskude ko waɗnoo e nder yontere ɓennunde ndee, tawa ina tuugnoo e goonga ngam yaltinde ciimtol laaɓtungol, ngonka tanaa oo.
Bayyinaango jaagordu nduu teeŋtinii, wonde losko ngoo maa laaɓtu, tawa ina gaddoo nuunɗal ina heɓee, tawa kadi renndo ngoo ina humpitee denndaangal geɗe baɗɗe ɗee, tawa kala ko goongɗaani, ko laaɓtaani soomotaako heen.
Oumar Elhaj
