Initiatives News L'info au service du développement
Related Articles
To galle laamorgo lesdi Muritani, Sergueï Lavrov hollitii yontii nde ɓe ndikkotoo seɓɓitiiɓe nder Sahel, kono kadi o yeewtidii e hooreejo leydi Muritani, peeje deentorɗe gila peete cumu wolde Ikreen naworaani heen Muritani haa jokkondiral leyɗe ɗiɗi ɗee mbonoraa heen, to bannge nguura e caasam énergie.
Ndeen yeewtere ɓuri ɗaddaade ko e tiiɗtingol jokkondiral leydi Muritani e Riisii to bannge awo, ngati o jaarii Muritani ngam weeɓtinande ɓe jaɓi awooɓe riisnaaɓe ƴetta laaɗe mumen ine ngawa e maayo haaɗngo Muritani.
Ngol woni laawol gadanol ko jaagorgal Riisi toppitiingal geɗe caggal leydiije ko ine yilloo Muritani. Yeddinaani Lavrov waɗiino njilluuji mum keewɗi nder doŋre Afrik. Ñande Talaata jofi alarba o jofti ɗoo e Muritani, omo ummorii Mali.
Jaagorgal leydi Riisii toppitiingal geɗe caggal leydiije yeewtidii e hooreejo leydi Muritani fekkuru Sahara occidental, o teeŋtinii leydi Riisii jeyaa ko e sehilaaɓe Sahara Occidental. Ndeen noon eɗen poti yiylanaade ɗum peeje mahiiɗe, memotooɗe jiytiniiɗe ngam yaltude e ɗee caɗeele, mbele kadi pellitte Diiso Kisal ONU siynee.
Ɓe njeewtidii caɗeele doŋre Afrik, e wiyde makko ɗeen caɗeele alaa mo nowaari ine toɗɗii kamɓe kala, ndeen alaa e sago golle ɓeydee ngam haɓaade seɓɓitiiɓe gijotooɓe ownooɓe yimɓe.
Ko noon ne kadi, Sergueï Lavrov saytoraani ruggaango to Ikreen e rewam maa baɗte mum nder winndere ndee, o ɓeydii heen ɗuum saabiima haa Afrik dañi caɗeele ŋakkere nguura, etee alaa mo fawi ɗum Afrik so wonaa Ngenndiiji Dentuɗi Amerik.
Hannde oo, alkamiis Sergueï Lavrov yaaɓanii to Khartuum, e to Sudan ngam joofnoyde toon njilliuji makko nder doŋre Afrik, garɗo ko adii lebbi seeɗa hade lulnde Riisi-Afrik jogornde waɗde tuggi 27 haa 29 juillet Saint-Pétersbourg.
Jaayre Pinal-JP
